12765
واحد لحاجة مهيمة بزاااف فحياة الانسان وهي اللي يمكن تجعل حياتو جميلة وتخليه يحس بمعنى السعادة وهي الشعور بالرضا على حياتو ..واخا يخيروه بين حياتو وبين شي حياة أخرى يختار يعيش حياتو هوا ماشي شي حياة خرا ..مين كيكون عندك الشعور بأنك نتا هوا نتا وبأنك تخلقت باش تعيش كيفما عشت ..كولشي كيولي ساهل وتحقيق الاحلام كيولي مسألة وقت ..هاد الشي اللي تكلم عليه باولو كويلهو فروايتو الخيميائي وسماه بالاسطورة الشخصية ..وتحقيق الاسطورة الشخصية كيتم من خلال الاصغاء لصوت الكون والاحساس بالذبذبات ديالو والتقاط الاشارات ديالو ..مين كتصبح منسجم مع الكون كيولي الكون كيوجهك نحو الهدف ديالك وكيقيض ليك الاشخاص اللي كيساعدوك فبلانات دياولك .. وهاد الشي هوا اللي كيسميه باولو كويلهو بالمؤامرة الكونية ..بمعنى أن كولشي فالكون كيولي خدام معاك نتا باش تحقق داك الشي بغيت ..بحال داك الشي كيوقع فالحكايات الشعبية والاساطير .. واول حاجة خاص الانسان يديرها وما يترددش فيها هوا القرار ..القرار حاجة مهمة خاصك تتخذو فالوقت المناسب ..ما يمكنيش نبقى نهدر فالسما ونعطيكم واحد المثال من هذا العبد الضعيف …كان عندي واحد الهدف مين كنت صغير هوا نولي كاتب ..يمكن هاد الشي حسيت بيه مين كان عندي شي ربع سنين ..كان الواليد داير لينا فالدار واحد المكتبة وفيها واحد الكتاب سميتو عباقرة الادب فيه فالواجهة ديالو شي تصاور ديال شي ادباء منهوم طه حسين والمنفلوطي والعقاد والمازني وجبران خليل جبران ..طبعا متقوليليش راه كاتب هادي ساهلا ..غير تسناو ..حتى حاجة مساهلا ..المهم انا بقيت كنقرا اللي طاحت فيدي باسم الله ..كتاب ..مجلة ..جورنال ..لوراق ديال الزريعة ..مين وصلت للسنة الخامسة ثانوي ..وهنا الكون غادي يبدا يدير خدمتو ..غادي يسيفط ليا واحد الاستاذ ديال الماط سميتو الطيب خرشوش ..استاذ غادي يآكتيفي واحد الاوبسيون جديدة عندي فالدماغ وغادي يعرفني على تلاتة ديال العباقرة فالتاريخ ..من بعد غادي نعرف بلي هادوك هوما اللي كيشكلو مثلث ديال الشك في تاريخ الفكر والفلسفة ..فرويد ..نيتشه وكارل ماركس ..طبعا مكنتش كانفهم كولشي داك الشي اللي كيقول ولكن كولشي كان مسجل عندي من بعد غادي نفهمو ..دازت شي تلت سنين حصلت فيها على الباكالوريا فالعلوم الرياضية ودخلت الاقسام التحضيرية للمدارس العليا للمهندسين وبديت كنكتب شوية ديال الشعر وتلاقيت بالزبير خياط ..هادا واحد من كبار الشعراء اللي جا يقري فزايو وهنا التدخل الثاني ديال المؤامرة الكونية ..عرفني الزبير على كبار الشعراء صلاح عبد الصبور وأمل دنقل وأحمد عبد المعطي حجازي وكان كيعطيني الدواوين ديالهوم وطبعا ما يمكنش تكون تقرا حجازي وتقرا الماط ..جراو عليا من الاقسام التحضيرية للمدارس العليا للمهندسين ودخلت المركز التربوي الجهوي شعبة الرياضيات وهنا يمكن تساءلو علاش ما اختصرتش الطريق مدام نتا كتبغي الادب ..متسرعوش ..داك المركز كان فيه واحد المكتبة كبيرة بقيت كنقرا فيها الكتوبا ديال الادب كول سيمانة كتاب ومنهم الاعمال الكاملة ديال شلا من ادباء وشعراء منهم نزار قباني حتا ان دوك الموظفين مين مات نزار قباني بقاو كيعزيو فيا ..وفهديك الفترة عرفني الزبير على شعراء وجدة الكبار مثل حسن الامراني ومحمد علي الرباوي وعبد الرحمن بوعلي اللي غادي يوليو الاساتذة ديالي فالجامعة من بعد ما جراو عليا من المركز التربوي الجهوي وهنا الاشارة اللي كان عليا نلتقطها ..مين كتوقع شي هزة ارضية خاصك تعرف بلي هاديك راه غير الكون شافك غادي فالطريق الخاطئ وبغا يزعزعك باش يحط فالمسار الصحيح ..ما علينا ..مين خديت شهادة دبلوم الدراسات المعمقة ومن بعد ما خدمت فالادارة فالرباط كان خصني ندير الدكتوراه ..وهنا خصني شي استاذ يقبل يشد معايا الاطروحة وانا مكنعرف حتا واحد فالرباط ..وخاصني على الاقل شي توصية من شي استاذ وهنا الكون غادي يدير خدمتو ..دخلت لكلية الاداب وهوا يبانلي حسن بحراوي اللي سبق لي قريت شي كتوبا ديالو ..كان حسن بحراوي فالساحة محاط بشي طلبة وكيعطي شي تصريح لشي قناة ولا لشي برنامج ..تسنيتو حتا سالا ومشيت لعندو ..سولني اش حب الخاطر ..قوتلو بغيت نسجل معاه واحد الاطروحة قالي فاش ..فالحقيقة مكان عندي حتى شي موضوع فديك الساعة ولكن بقيت كنتحدث معاه فدوك الكتوبا ديالو وجلسنا شربنا واحد لقهيوة فالنادي ومين تفارقنا قالي يكون الخير..ممكن تحط الملف ديالك فالكلية وشوف على مولانا وتبادلنا ارقام الهاتف ومشيت فحالي ..دازت ليام وتلاقيت واحد السيد بقيت كنتحدث معاه وسولني على الدكتوراه قتلو راني باغي نشدها مع حسن بحراوي .. قالي غي نسا الموضوع ..راه بحراوي مشغول بزاف وراه بعدا ميفيقش ليك معا الصباح وراه كيشد الاطاريح غير معا صحابو وصحاباتو ..المهم انا مين قالي داكشي نسيت الموضوع وطويتو نهائيا ..ومعاود سولت فيه ..حتا لواحد النهار ..كيوصلني الميساج من حسن بحراوي ..كيقولي راه تم قبول اطروحتك يمكنك الاتصال بمصلحة شؤون الطلبة فالكلية ..الاطروحة ماشي مهمة فحد ذاتها ..ولكن المهم انه فتلك اللحظة بدات علاقتي بالاستاذ حسن بحراوي وماشي علاقة طالب باستاذ مشرف ولكن علاقة صديق بصديق ..وغادي يفتح لي بيتو ومكتبتو العامرة وغادي نعرف حسن بحراوي الانسان وحسن بحراوي المبدع والناقد وحسن بحراوي المثقف حسن بحراوي علبة اسرار المشهد الثقافي في المغرب الحديث .. حسن بحراوي العارف بخبايا الثقافة العالمة والشعبية والمواكب لرحلة الرواية المغربية من التاسيس الى الحداثة حسن بحراوي المختص فالتراث الكولونيالي وادب الرحلات حسن بحراوي المترجم والموسوعة كثيرة المداخل والابواب ..وباختصار شديد المفرد بصيغة جمع الجموع ..وهي العلاقة اللي غادي تفتح لي آفاق واسعة سعة الكون نفسه ..وغادي نولي فقلب المشهد الثقافي المغربي وكنتلاقا النخبة ديال النخبة فجميع المجالات المتصلة بالثقافة والفنون والاداب مخرجين ..فنانين تشكيليين ..شعراء ..نقاد كنت غير كنسمع عليهم فالتلفزة وكنقرا ليهم وعليهم فالملاحق الثقافية ..ومزال العاطي يعطي وتستمر مسيرة الحلم.
يوسف توفيق