صندوق كورونا

كيجيب ليا الله بزاف اديال الناس كيشوفو فصندوق كورونا همزة من الهموز ، وكل واحد من هذا الناس باغي جطو منو ولهلا يقلب تجي الصحة ماتجيش يموت اللي بغا يموت ويعيش اللي بغا يعيش ماشي اشغلهم. ولبلاد هذيك هي اللي ما تعاودش ليهم عليها على حقاش غادي يعتبروك من ذاك الدك (ثلاثة النقط فوق الكاف) اديال الوطنيين اللي تكرفسو عليهم ماللي ناضلو ضد الاستعمار.

والشعب عاودثاني الى جبدتيه ليهم هي كتقلب على جوا منجل والا صباط للعجل .

هذو ثقافة الريع والهمزة عندهم فالدم ماشي غير فالمخ، ويمكن تشوف بعضين منهم بالكوستيم والمقججة او السوسدي والبزيوي والكات كات واعجين لفرانسوية والعطلة فالكوت دازور او الحج والعمرة وما عرفتياش، وماللي تبان الهمزة دغيا كيوليو بحال الميخالة او الطفيليين اديال الاعراس والماتم . اللي شافوه بغاو منو وخا يكون فانيد اديال السهلة.
ومن غير هدشي، بدا كيبان ليا باللي شي بعضين، هذا اصحاب التعليم الخاص والمصحات، بحال بان ليهم باللي اصلاح المستشفى العمومي والمدرسة العمومية غادي يدخلو للاجندة السياسية بقوة والى انجح شي اصلاح غادي يكون ضد مصالحهم، لذلك قرروا يبداو التبرزيط والعمل على افشاله قبل مايبدا.

وكيبان بحال الى كانوا طامعين تهز الدولة يديها كيف واعد بنكيران، فاذا بها غادي ترجع تتحمل المسؤولية اللي كانت تخلات عليها. ماننساوش ان هذو اللي كيطلبو جطهم من صندوق كورونا وغير ذلك هما اللي كانوا هجمو على الكاتب العام لوزارة المالية لما تكلم على الغش الضريبي وضغطو باش يطيروه وحتى طمعو واحد لوقيتة، لكن الراي العام، اللي سماه بعضهم جماعة اديال المحسادين، خيبو مسعاهم . هذ الموضوع خصو وقفة.

محمد نجيب كومينة / الرباط