لحظة ملحون : قصيدة سمية

نظـم عبدالإله المـعتصم

قياس الوردة لابن سليمان :

بِكْ يَامُولَاتِي مَغْرُومْ رُوفْ يَازَهْوْ نْيَامِي * يَالْـهِـيفَا مَصْبَـــاحْ الـزِّينْ رُوحْ دَاتِي سُمِيَّا

جَـارْ عَنِّي لَغْرَامْ أَمَــالْكِي وَحْرِكْ لَـلْـطَـامِي *** صَاكْ لِي بَجْيُوشُو مَنْ كُلّْ جِيهْ سَرْبَاتْ اقْوِيَّا

مَنْ اغْرَامَكْ يَامُولَاتِي اَضْحِيتْ زَاهَدْ فِمْنامي***هَزّْنِي وَخْرَبْ دِيوَانِي وُجَــارْ بَالْقَهْــرْ اَعْـلِيَّا

مَاكْـوَا حَدّْ بْنَارْ اَلْبِيْنَ كِيفْ نَـكْوَاتْ عْـظَامِـي ***سْرَاتْ لِي فِي دَاتِـي وُلَاْ بْقَاتْ عَـنْدِي مَـكْمِيَّا

غِيْر نَرْتِي نَايَحْ وَفْـرِيْدَ لَا مْـوَنَّسْ فَـرْسَامِـي ***ضَاقْ حَالِي وَدْمُوعْ الْعِينْ فَوقْ لَخْدُودْ سْخِيَّا

شَاقْ شُوقِي وَفنَى صَبْرِي وُغِيْر زَايَدْ تَخْمَامِي***مَاوْجَدْتْ رْسُـولْ ايْخَبْرَكْ آشْ مَاصَايَـرْ بِيَّا

بِكْ يَامُولَاتِي مَغْـرُومْ رُوفْ يَازَهْوْ نْيَامِي * * * يَالْـهِـيفَا مَـصْبَــاحْ الـزِّينْ رُوحْ دَاتِي سُمِيَّة

نَافْرَا مَنْ سَاحَةْ قُرْبِي وُلَا دْرِيتِي تَـدْمَــامِــي ***كِيفْ نَعْمَلْ وَاشْ الْمَعْمُولْ رُوحْ دَاتِي مَسْبِيَّا

دَبْلْ لُونِي وَالجَسْـمْ نْحَالْ لَا لْـدَادَة فْـطْعَامِــي ***حَالْتِي لَا حَالَه مَكْسُورْ مَاعْـطَفْ قَلْبْ عْــلِيَّا

ضَرْ دَاتِي مَالِـيهْ عْلَاجْ زَادْ بَجْـفَـاكْ عْـدَامِي ***يَامْـنَ بْـهَـــاكْ سْــبا عَقْـلِي وُزَادْ فَـقْلِـِيبي كِيَّا

لَاطْبِيبْ ايْدَاوِي بَدْوَاهْ طَالْ ضَرِّي وَسْـقَامِي ***صَابْنِي مَاصَابْ اْلعَبْسِي مَنْ غْـرَامْ الْــعَدْرِيَّا

لاَ اَلمُوتْ غْشَانِي نَرْتَاحْ مَنْ سْقَامِي وَهْيَامِي ***حَـازْنِي مَـيْسُورْ غْـلَالُو وُلَاعْـمَلْ لِي شَـرْعِيَّا

بِكْ يَامُـولَاتِي مَـغْرُومْ رُوفْ يَـازَهْوْ نْيَامِي * * * يَالْـهِـيفَا مَصْبَــاحْ الـزِّينْ رُوحْ دَاتِي سُمِيَّة

حِـينْ رِيتَكْ آمُولَاتِي نْـسِيتْ تَعْبِي وَضْيَامِي ***صَرْتْ بِـيكْ اَمْـسَلَّي هَانِي وُعَادْ كَـمْلَـتْ لَمْزِيَّا

بِيكْ نْهَنَى وَالّدّاتْ تَرِيع يَنْفَجَى حَلْكْ غْتَامِي ***يَالِّـلي بَوْصُولَـكْ زَالْ الـضّْمَا وُالـمْهَـاجْ زْهِـيَّا

بِيكْ نَفْخَرْ بِينْ حْـبَابِي وُبِيكْ تْزْهَارْ رْسَامِي ***لــوتْـريْـد الـرُّوحْ نْبَـرِّي نْهِــيْــبَهَا لِـيـكْ هْــدِيَّا

يِوُمْ جِيتِينِي جَانِي كُلْ خِيرْ وَحْييتْ غْرَامِي ***ضَـاوْيَا شَمْسَـكْ فَــسْمَـايْ أَمّْ العْيُونْ الـصَّرْدِيَّا

لَابْسَه مَنْ لثْيَابْ رْهِيفَ فَاقْ لَحْرِيرْالشَّامِي ***بالْـبْهَــا وَالـسَّـرْ الْـمَكْـمُولْ فَـالْعْـلُـو كَـنّْ ثْـرِيَّـا

بِيكْ يَامُولَاتِي مَغْرِومْ رُوفْ يَا زَهْوْ نْيَامِي * * *يَالْـهِـيفَا مَصْبَـاحْ الـزَّينْ رُوحْ دَاتِي سُمِيَّة

فْالرّْيَاضْ حْتَافَـلْتْ وُبِيكْ صَلْتْ يَانَعْتْ الدَّامِي***بِالسّْـرُورُ غْنَمْـنَا فَرْجَـا امْعَــاكْ نَـلْتْ الْأُمْنِيَّا

بَيْن وَرْدْ وُسُـوسَانْ وُيَـاسْـمِيـنْ زَهِّيتْ نْيَـامِي***شَاهِدِينْ عْلَى صَدْقْ الحُبّْ اللِّي جْمَـعْنَا بَالنِّيَّا

وَلَطْيَارْ تْغِيرْ مْنَ وْصَالْـنَا وُبَالـصُّوتْ الْحَامِي***فُـوقْ لَغْـصَانْ تْـرَارِي شَادْيَـا بْـلَـنْغَـامْ شْجِيَّا

وَالطَّرْ وُكَـمَانْ وْعُـودْ تَــايْـنَـشْــدُو فَـنْغَــامِــي***خِيْرِ مَـافَـالْـفَـنَّانَـة نَـاشْــدِيـنْ نَـغْـمَـة دُوقِـيَّـا

غِـيْرأَنَـا وَأَنْـتِ وُلَا شْــرِيــكْ دُونَــكْ أَمَــامِــي***عَـالْحُبّْ وُالـوْفَــا فَـحْـيَاتْـنَـانْعِـيــشُو سُـوّيـَّـا

بِيكْ أَلْـفْ مْـرَحْـبَـا يَـالـرِّيـمْ جِــيـتِي لَـمْـقَـامِـي***مَانْـفَـرْقـَكْ مَاتْـفَـرْقِـنِي وْجُودْ بَالـطَّاعَـة لِيَّـا

دِيرْ خَدَّكْ عْلَى خَـدِّي وُصِيغْ هَـمْسِي وَنْـسَامِي***مَنْ شْـفُوفُـكْ نَـرْوَى وَرْحِيقْهَا يْـفَاجِي مَابِيَا

خُـدْ يَاحَـفَّــاظِي حُـلَّـة مْرُوْنقَـة طَّرْزْ نِّـظَـامِـي***صُـولْ بِـهَـا بِـينْ الـدُّهَـاة جُـوهَـرَة مَـحْضِيَّا

وَاسْـمِي مَايَخْـفَـى لِـلْـعَـارْفِـيـنْ دَكْـرُو فْنَظَامِي***ألْمُعْـتَصِـمْ آرَبـِي تْـجُــودْ بَـعْــفُــوكْ عـْـلِـيَّـا

وَالسَّـلَامْ نْهِـيـبُو لـلْعَـارْفِـينْ فِي طَـرْزْ كْـلَامِي***وَلْـشْـرَافْ وُطَـلْـبَا وُقْـمَاهْـرْ لْمْعَانِي وَسْجِـيَّا