مدير ميدي 1 و تيفي و العمل النقابي

نسيت باللي حسن خيار هو مدير ميدي ان وتيفي حاليا، وماللي تذكرت ما جانيش غريب ان يحارب العمل النقابي بطرق كتذكر بشي حاجة اكثر من سنوات الرصاص. الرجل ماشي اسخون بالدعم اديال اللي عينو وجابو من شركتو اديال البانو اديال الاشهار فقط، بل لان له ذكريات سيئة مع العمل النقابي والنقابيين من نهار تفجرات فضيحة التعاضدية العامة لموظفي الدولة وتشد رئيسها السابق الفراع ومعه موظفين فالتعاضدية وايضا عناصر من الشركات التي اتهمت بالتواطؤ والغش والتدليس.
كاينين بعض النفذين فالدولة اليوم، اللي كيعتبرو انفسهم فوق السلط وربما مقدسين، اعزيزة عليهم نوعية معينة من الناس وكيزيدوهوم اصحابهم اللي دايرين بهم كيعطيوهوم الفتاوي اللي فالنهاية كيصرفوها افلوس. وصفقات ميدي ان معروف مع من فهذا خياتنا من اغنياء العهد الجديد.
جيت ملخر، والى رجعنا لقطيع الريوس ماعليهش. باين المرحلة الجاية خص شي عدو او خطر، ويمكن بانت لشي بعضين يقضيو على الصحافي الحر وجعل الجميع يردد نفس المعزوفة “قولو العام زين”، انساو يمكن لكمالة اديالها “طردونا ملوزين” وباللي الوقت ماشي بحال شي وقت وباللي احساس القضاء على السياسة والاحزاب والتعددية الحقيقية مجرد احساس مولد للاوهام الخطيرة على اصحابها وعلى البلد. فين البصري اللي كان كيشوف من راسو مكتطيح واللي قبل منو. بنادم اللي ما كيفهمش خصك تدير ليه الخشيبات وخا يكبر حتى يعيا.